2019 ий 21 январьыште эртыше Куженер районысо «Марий Кумалтыш» общинын идалыкаш погынымашыжын 1-ше протоколжо

2019 ий 21 январьыште эртыше Куженер районысо «Марий Кумалтыш» общинын идалыкаш погынымашыжын 1-ше протоколжо

Погынымашыште 11 еҥ лийын (Актуганов В. М., Иванов В. Г., Герасимов В. А., Каменщиков Е. А., Иванов А. А., Калачёв А. И., Нефонтов В. С., Петухов Э. Н., Попов В. М., Иванов В. И., Горинов Л. И.). Йошкар-Ола гыч «Марий Кумалтыш» общиным вуйлатыше В. Ф. Смирнов, тыгак И. А. Степанова лийыныт.

Погынымашын председательже – Л.И. Горинов, секретарьже – Е.А. Каменщиков.

Кечын радамже:

1. Куженер районысо «Марий Кумалтыш» общинын 2018 ийысе пашажым иктешлымаш.
2. «Марий кумалтыш» религий организацийын Уставшым шуктымо шотышто йодыш.

Икымше йодыш дене районын тўҥ картше Горинов Л. И. мутым кучен. Тудо шуктен толмо пашаж нерген каласкален. Визым, Йывансола, Шинур, Шўдымарий, Тошто Йўледўр яллаште кумалтыш лийын. Агавайрем кумалтыш Шинур, Визым, Йырмарий, Шўдымарий да Йывансола яллаште лийын.

Общинын еҥже-влак (Актуганов В. М., Горинов Л. И.) яллаште илыше-влакын йодмышт почеш суртлаште кумалтышым эртареныт.

Горинов Л. И. тыгайрак шонымашым луктын каласен: эн ончычак районысо школлаште марий вера нерген мом палымышт шотышто йоча-влак коклаште сочиненийым эртараш. Тидыжым Шўдымарий школ гычат тўҥалаш лиеш – ты шотышто кутыренат келшыме. Тидын нерген эн ончычак Андрей Ник. Поликарпов 2018-ше ий тўҥалтыште луктын каласален ыле. Чаманен каласыман, тудын ўмыржє пеш вашке лугыч лийын, сандене тудым шарныме семын тиде пашам тўҥалманак. Тыге йоча-влакым марий илыш-йўла деке да марий калыкын вераж деке кумылаҥдаш лиеш.

Горинов Л. И. Свердловск областьысе урал марий-влак дене чак кылым шарен колтымо нерген каласкалыш. Шкеже ту кундемысе кумалме вер-влакым ончен лекме да нунылан полшымо амал дене шошым миен толнеже. А варажым тусо делегацийым Йырмарий ялыште эртаралтше кумалтышыш ўжаш. Урал марий карт-влак дене кылым эше 2015 ийыштак кылым пеҥгыдемдыме. Горинов Л. И. ден Калачёв А. И. мемнан республика нерген историй сынан да духовный шўлышан литературым колтеныт. Кумалтышым вияҥден колташ нуно тореш огытыл.

Тошто Йўледурыштє эртаралтше кумалтыш нергенат каласкалыш. Тушко верысе калык веле огыл, тыгак пошкудо Параньга да Шернур гыч толыныт, воктенысе ял гычат погыненыт. Тидын нерген Марий радиоат увертарен шоген. Йоча-влакымат кумылаҥдаш тыршыме.

Герасимов В. М. теве мом ойлен: Иштымбал кундемын калыкшат кумалтышым эртараш тореш огыл. Актуганов В.М. ден Горинов Л.И. кумалме верым ончен лекташ да сугыньым пышташ келшеныт. Тыгак Мари Шой калыкланат кумалтышым тўҥалаш полшаш кўлеш.

Горинов Л. И. «Искра» (колхоз) ял озанлык артельын вуйлатышыже Н. А. Поликарповлан Шўдымарий кундемыште кумалтышым эртараш вольыкым пуымыжлан таум каласен.

Степанова И. А. республисе МарГУ пелен карт-влакым ямдылыме нерген ойлен. Куженер кундем гыч кум еҥ тушто тунемеш. Тиде сай. Нунын кокла гыч иктыже – Иванов В.Г.

Тудо тунеммыж нерген теве мом каласыш: тунемаш оҥай, умылаш чыла лиеш.

Степанова И. А. умбакыже мутым шуйыш. Тыгай курс эшеат лиеш, студент-влакым ямдылаш кўлеш. Марий Кугече марий йўла почеш кугарнян эртаралтеш, тидым шарнен да шуктен шогыман. «Марий кумалтыш» туҥ марий общинын кузе илымыж нерен мутым лукто, общинын Уставшым пудыртымат вашлиялтеш.

Смирнов В. Ф. Уставым пудыртымо нерген палемдыш. Эше тидымат шижтарыш: кумалтышым эртарыме годым южыжо аракамат подылеш да шкенжым шот дене кучен ок мошто. Умбакыже тыгай кўлдымаш койыш ынже лий манын, чылажымат келшен, умылен пашам ыштыман.

Йодыш-влакым каҥашымеке, ойым пидме:

1. Организацийын Уставшым шотыш кондымо шотышто «Марий Кумалтыш» тўҥ религий общиным полшаш йодаш.
2. Уставын йодмыжым шуктен толмо шотышто «Марий Кумалтыш» общиныште тўшка погынымашым эртараш.

Йўкым пуэныт:

«Келшаш» – чылан.
«Тореш» – иктат уке.
«Голосоватлен огытыл» – иктат уке.

Погынымашын председательже: /______________________ / Горинов Л.И.
Секретарьже: /______________________ / Каменщиков Е.А.

Ваш email не будет опубликован. Требуется заполнить поля "Имя" и "Email".